ચાબહાર પોર્ટ પર ફંડિંગ રોકવાનો ભારતનો નિર્ણય નિરાશાજનક છે, ઈરાનના વિદેશ મંત્રીએ આપ્યું મોટું નિવેદન
ચાબહાર બેલ્ટ પ્રોજેક્ટ માટે આ વર્ષે કોઈ ફંડ નહીં આપવાના ભારતના નિર્ણય પર ઈરાને નિરાશા વ્યક્ત કરી છે. ઈરાનના વિદેશ મંત્રી અબ્બાસ અરાઘચીએ કહ્યું કે ફંડ ન આપવાનો ભારતનો નિર્ણય નવી દિલ્હી અને તેહરાન બંને માટે નિરાશાજનક છે. તેમણે કહ્યું કે આ પ્રોજેક્ટ મધ્ય એશિયા અને યુરોપ સાથે કનેક્ટિવિટી વધારવામાં મહત્વની ભૂમિકા ભજવી શક્યો હોત. જ્યારે અરાઘચીને આ વર્ષના ભારતના બજેટમાંથી ચાબહાર પ્રોજેક્ટને બાકાત રાખવા વિશે પૂછવામાં આવ્યું ત્યારે તેણે કહ્યું, ‘મને લાગે છે કે તે ઈરાન અને ભારત બંને માટે નિરાશાજનક છે.
અરાઘચીએ વડા પ્રધાન નરેન્દ્ર મોદીના નિવેદનનો ઉલ્લેખ કર્યો જેમાં તેમણે ચાબહારને ‘ગોલ્ડન ગેટ’ તરીકે વર્ણવ્યું હતું, જે હિંદ મહાસાગર ક્ષેત્રને મધ્ય એશિયા અને પછી યુરોપ સાથે જોડે છે. ઈરાનના વિદેશ મંત્રીએ કહ્યું, આ ખૂબ જ વ્યૂહાત્મક બંદર છે. જો તેને સંપૂર્ણ રીતે વિકસિત કરવામાં આવે તો તે ઈરાન દ્વારા ભારતને મધ્ય એશિયા, કાકેશસ અને ત્યારબાદ યુરોપ સાથે જોડવામાં ખૂબ જ મહત્વપૂર્ણ ભૂમિકા ભજવી શકે છે.
